Seçki sorğusu kimi önə çıxarır?
Gürcüstanın “İnterpressnyus” informasiya agentliyi oktyabrın 28-nə təyin olunmuş prezident seçkisi ilə bağlı sorğu keçirib. Novator.az xəbər verir ki, 19 mindən çox seçicinin iştirak etdiyi sorğunun nəticələrinə görə, respondentlərin 32%-i müstəqil namizəd, sabiq xarici işlər naziri, deputat Salome Zurabişviliyə dəstək nümayiş etdirib.
Öz namizədini irəli sürməyən hakim Gürcü Arzusu – Demokratik Gürcüstan Partiyası seçkidə Salome Zurabişvilini dəstəkləyir.
İkinci yerdə bir çox müxalif partiyanın namizədi olan keçmiş xarici işlər naziri, Vahid Milli Hərəkat Partiyasının üzvü Qriqol Vaşadze gəlir. Respondentlərin 26%-i onu prezident görmək istədiyini deyib.
Gürcüstan parlamentinin sabiq sədri, Quruculuq Hərəkatı Partiyasının lideri David Usupaşvili 11%-lik göstərici ilə sorğuda üçüncü olub.
Seçkinin ilk turunda qalib gəlmək üçün prezidentliyə namizəd seçici səslərinin 50%-ni qazanmalıdır. Dövlət başçısı postuna 25 namizəd iddia edir.
Gürcüstanda prezidentin səlahiyyətləri məhduddur. Hökuməti 150 yerlik parlamentə azı 76 mandat əldə edən partiya formalaşdırır. 2016-cı ilin oktyabrında keçirilmiş son parlament seçkisində Gürcü Arzusu – Demokratik Gürcüstan Partiyası 115 mandat qazanıb. 2012-ci ildə qurulmuş partiya həmin ilin oktyabr ayından hakimiyyətdədir.
Səidə Hüseynova
