General oğlunun itirdiyi postu qadın tutdu
Diana Qasparyan Ermənistanın Eçmiədzin şəhərinin meri seçilib. Novator.az-ın məlumatına görə, o, Ermənistanda mer postunu tutan ilk qadındır.
Hökumət başçısı Nikol Paşinyanın sədrlik etdiyi Vətəndaş Sazişi Partiyasının üzvü olan Diana Qasparyan 2013-cü ildən Ədliyyə Nazirliyində çalışıb, bu il iyunun 25-dən Eçmiədzin merinin səlahiyyətlərini icra edib.
İlkin nəticələrə əsasən, Diana Qasparyan oktyabrın 21-də keçirilən mer seçkisində 8 mindən çox səs toplayıb.
Ölkənin dini mərkəzi olan Eçmiədzinin əvvəlki meri Karen Qriqoryan iyunun 18-də istefa verib. O, məhbus general-leytenant Manvel Qriqoryanın oğludur. İyunun 16-da tutulan Manvel Qriqoryan qanunsuz silah-sursat saxlamaqda, özgə əmlakını talamaqda təqsirli bilinir.
Karen Qriqoryana da ittiham irəli sürülüb. İstintaq üzə çıxarıb ki, 2016-cı ilin mayında Karen Qriqoryan atası ilə və başqa şəxslərlə əlbir olaraq Rusiyadakı erməni diasporunun Dağlıq Qarabağa göndərdiyi UAZ markalı üç avtomobili mənimsəyib. Karen Qriqoryan haqqında başqa yerə getməmək qətimkan tədbiri seçilib.
Manvel Qriqoryanın həyat yoldaşı Nazik Əmiryana isə qanunsuz silah-sursat saxlamaq ittihamı verilib. Nazik Əmiryan iyunun 27-də şübhəli şəxs qismində tutulub, iyunun 30-u başqa yerə getməmək şərti ilə sərbəst buraxılıb.
