SSRİ-yə qarşı çıxmış deputatlar
Azərbaycanın dövlət müstəqilliyinin 27 ili tamam olub. 1991-ci il oktyabrın 18-də parlament dövlət müstəqilliyinin bərpası haqqında 30 avqust bəyannaməsinə əsaslanaraq uyğun konstitusiya aktı qəbul edib, dekabrın 29-da isə həmin akt ümumxalq səsverməsi ilə təsdiqlənib.
Dövlət müstəqilliyinə aid daha bir gün var. 1991-ci il martın 7-si parlamentdə “Sovet Sosialist Respublikaları İttifaqının saxlanması məsələsi üzrə SSRİ referendumunun Azərbaycan Respublikasında keçirilməsinin təşkili haqqında” qərar qəbul olunub. 43 deputat 17 mart referendumuna qatılmağın əleyhinə çıxıb.
Novator.az bildirir ki, onların 3-ü – Fərəc Quliyev, Tahir Kərimli və Vahid Əhmədov indi də Azərbaycan parlamentində təmsil olunurlar.
Tamerlan Qarayev Azərbaycanın İndoneziyada səfiri (Filippin, Sinqapur və Şərqi Timorda da akkreditə olunub), Cənub-Şərqi Asiya Dövlətləri Assosiasiyası (ASEAN) yanında daimi nümayəndəliyin başçısıdır.
Tofiq Qasımov İsveçrədə yaşayır.
İstiqlalçı deputatlardan Allahverdi Həsənov, Aydın Məmmədov, Bayram Bayramov, Dilarə Əliyeva, Eldar Bağırov, Ədalət Rəhimov, Əyyam Musayev, Faiq Baxşəliyev, Heydər Əliyev, İsmayıl Şıxlı, Məmməd Xələfov, Məryəm Həsənova, Mürşüd Məmmədli, Tofiq Bağırov, Şadman Hüseynov, Şahmərdan Cəfərov, Yusif Səmədoğlu dünyasını dəyişib.
1991-ci il martın 7-də müstəqilliyə bu deputatlar da səs veriblər: Arif Hacılı, Cümşüd Nuriyev, Etibar Məmmədov, Firudin Cəlilov, Füzuli Axundov, Hacıbaba Əzimov, Hicran Kərimli, İbrahim İbrahimli, İxtiyar Şirin, İsa Qəmbər, İsgəndər Həmidov, Maşallah Abdullayev, Mətləb Mütəllimov, Mirmahmud Mirəlioğlu, Nəriman Həsənzadə, Ramiz Fətəliyev, Rəhim Qazıyev, Tahir Əliyev, Sabir Rüstəmxanlı, Sülhəddin Əkbər, Vaqif Novruzov.
1922-ci ildə yaradılmış SSRİ-yə dağıldığı 1991-ci ilə qədər 15 respublika daxil olub: Estoniya, Latviya, Litva, Moldova, Belarus, Ukrayna, Rusiya, Azərbaycan, Ermənistan, Gürcüstan, Qazaxıstan, Qırğızıstan, Tacikistan, Özbəkistan, Türkmənistan.
