Paşinyan Yerevan-Bakı rabitəsindən danışıb
Ermənistan hökumətinin başçısı Nikol Paşinyan Yerevanla Bakı arasında operativ əlaqə qurulduğunu bəyan edib. Novator.az-ın məlumatına görə, oktyabrın 18-də jurnalistlərə açıqlama verən Nikol Paşinyan cəbhə xəttində misli görünməmiş sakitliyin hökm sürdüyünü deyib. O, atəşkəs rejiminə ciddi riayət olunmasını Tacikistanın paytaxtı Düşənbədə əldə olunmuş razılaşma ilə də bağlayıb.
Sentyabrın 28-i Düşənbədə Azərbaycan prezidenti İlham Əliyevlə Ermənistanın baş naziri Nikol Paşinyan arasında söhbət olub. Prezident və baş nazir Dağlıq Qarabağ münaqişəsinin nizamlanmasına, tərəflərin təmas xəttində, eləcə də sərhəddə insidentlərin qarşısının alınması üçün atəşkəs rejiminin möhkəmlənməsinə dair danışıqlar prosesinə sadiq olduqlarını bildiriblər, müvafiq strukturlar arasında operativ əlaqə qurulması üçün mexanizmlərin yaradılmasını qərara alıblar.
Nikol Paşinyan jurnalistlərə 18 oktyabr açıqlamasında Azərbaycan hakimiyyəti ilə etibarlı operativ rabitə qurulduğunu deyib: “Zərurət olanda informasiya yarım saat ərzində Azərbaycan prezidentinə və ya əks istiqamətdə çatır. Əlbəttə, yalnız zərurət olduqda əlaqə qururuq”.
Ermənistan Azərbaycan ərazisinin bir hissəsini – Dağlıq Qarabağ bölgəsini (Xankəndi şəhəri, Şuşa, Xocalı rayonları tam, Xocavənd rayonu, keçmiş Ağdərə rayonu qismən) və onun ətrafındakı bölgələri (Laçın, Kəlbəcər, Qubadlı, Zəngilan rayonları tam, Ağdam, Füzuli, Cəbrayıl rayonları qismən), eləcə də Qazax rayonunun 7, Naxçıvan Muxtar Respublikasının 1 kəndini 25 ildir işğal altında saxlayır.
1994-cü ilin may ayından atəşkəs rejimi qüvvədədir.
