Köçəryan avtobioqrafik kitab yazıb
Ermənistanın sabiq prezidenti Robert Köçəryan kitab yazıb. Novator.az-ın məlumatına görə, Robert Köçəryan Rusiyanın “RİA Novosti” agentliyinə müsahibəsində deyib ki, avtobioqrafik xarakter daşıyan kitab noyabrın əvvəllərində işıq üzü görəcək.
Sabiq prezident kitabın Qarabağ hadisələrinin başladığı 1988-ci ildən 2008-ci ilə qədər olan dövrü əhatə etdiyini vurğulayıb: ”Kitabda erməni oxucunun bilmədiyi çox yeni və maraqlı məqamlara toxunmuşam. Söhbət tariximizin dramatik dövründən gedir. İndiki məqam üçün nəyi yazmaq mümkündürsə, onu qələmə almışam. 10 il sonra kitabın yeni redaksiyası daha əhatəli alına bilər. Hələlik indiki məqamda nə yazmaq mümkündürsə, o yazılıb. Bu, 1988-2008-ci illər arası baş verən hadisələr barədə açıq bir söhbətdir”.
Robert Köçəryan 1954-cü ildə Azərbaycanın Dağlıq Qarabağ bölgəsinin Stepanakert şəhərində doğulub. Yerevan Politexnik İnstitutunun məzunudur. 1980-ci ildən Dağlıq Qarabağın komsomol və partiya orqanlarında məsul vəzifələr tutub.
1988-ci ildə başlayan işğalçı Qarabağ müharibəsinin rəhbərlərindən biridir. 1992-1997-ci illərdə Dağlıq Qarabağdakı separatçı rejimə başçılıq edib. 1997-ci ildən Ermənistanın baş naziri, 1998-ci ildən 2008-ci ilə kimi prezidenti olub.
1988-ci ilin fevralında Azərbaycanın Dağlıq Qarabağ vilayətinin Ermənistana verilməsi tələbi ilə separatçı hərəkat, hərbi təcavüz başlayıb. 1991-ci il sentyabrın 2-də ermənilər Dağlıq Qarabağı “müstəqil dövlət” elan edib, işğalçı müharibə alovlanıb. 1994-cü ilin mayında atəşkəslə dayanan müharibədə Ermənistan Dağlıq Qarabağ bölgəsini (Xankəndi şəhərini, Şuşa, Xocalı rayonlarını tam, Xocavənd rayonunu, keçmiş Ağdərə rayonunu qismən) və onun ətrafındakı bölgələri (Laçın, Kəlbəcər, Qubadlı, Zəngilan rayonlarını tam, Ağdam, Füzuli, Cəbrayıl rayonlarını qismən), eləcə də Qazax rayonunun 7, Naxçıvan Muxtar Respublikasının 1 kəndini işğal edib.
