Sürüşmə: ərazidə gərginlik davam edir
Ekologiya və Təbii Sərvətlər Nazirliyinin yaratdığı qərargah Bakının Badamdar qəsəbəsindən 20-ci sahəyə enən avtomobil yolunun sağ kənarında oktyabrın 12-dən fəallaşmış torpaq sürüşməsi ilə bağlı yeni məlumatlar yayıb.
Oktyabrın 18-i saat 9-a olan xəbərə görə, hasar divarları istiqamətində uçqunların artımı qeydə alınıb. Evlərin divarlarına qoyulmuş mayaklarda dəyişiklik olmayıb. Torpaq qatı yola doğru gözlə görünəcək dərəcədə irəliləyib. Ərazidə ümumi stabil gərginlik qalır.
Saat 12-də qərargah bildirib ki, sürüşmə sahəsinin sol hissəsindəki çatlarda müəyyən artım var, istinad divarının solunda yeni qövsvari çatlar əmələ gəlib. Uçqun divarının yanındakı evin hasarında cüzi deformasiya müşahidə olunub.
Saat 15-ə olan bilgiyə əsasən, ərazidə gərginlik davam edir. Sürüşmə sahəsinin yuxarı hissəsində yeni uçqun, töküntü prosesləri müşahidə olunur. Bunun nəticəsində də sürüşmə sahəsinin yuxarı hissəsi fərdi tikililərə doğru irəliləyir. Sürüşmənin sol hissəsindəki torpaq qatında yeni müxtəlif istiqamətli çatlar əmələ gəlib.
