Rusiyanın maaş liderləri
Rusiyanın Maliyyə Araşdırmaları Milli Agentliyi yeni hesabat yayıb. Novator.az xəbər verir ki, hesabata əsasən, 2018-ci ilin birinci rübündə ən yüksək maaşlı sahə maliyyə sektoru olub. Maliyyəçilərin orta əməkhaqqı 87 min 991 rubl təşkil edərək ümumrusiya göstəricisini iki dəfə qabaqlayıb. Məlumata görə, ölkə üzrə orta aylıq əməkhaqqı 42 min 521 rubldur (ƏDV nəzərə alınmadan).
Maaş reytinqinin ikinci pilləsində faydalı qazıntıların çıxarılması ilə bağlı peşələr (86 min 982 rubl), üçüncü pilləsində rabitə və informasiya sahələrində çalışanlar (70 min 839 rubl) gəlir.
Ən az gəliri olan peşə sahibləri otel və ictimai-iaşə müəssisələrində xidmət edənlərdir. Onların orta aylıq əməkhaqqı 25 min 842 rubldur.
Meşə, kənd təsərrüfatı, ovçuluq, balıqçılıq (28 min 251 rubl), su təchizatı, kanalizasiya sistemi, tullantıların yığılması və emalı sahələri də (30 min 519 rubl) az maaşlı sektora aiddir.
Maliyyə Araşdırmaları Milli Agentliyi ən yüksək və ən aşağı maaşlı regionları da müəyyən edib. İlk üç pillədə Mərkəzi (53 min 406 rubl), Uzaq Şərq (52 min 759 rubl) və Şimal-Şərq (48 min 654 rubl) federal dairələri qərarlaşıb.
Ən aşağı əməkhaqqı Şimali Qafqaz dairəsində qeydə alınıb: 26 min 251 rubl.
1 Rusiya rublu 0,0259 manatdır.
Səidə Hüseynova
