Sərmayə: hara nə qədər vəsait qoyulub?
2018-ci ilin yanvar-sentyabr aylarında Azərbaycana yatırılan sərmayənin 54,3 faizi sənaye, 20,8 faizi tikinti, 13,1 faizi nəqliyyat və anbar təsərrüfatı, hər birində 2,6 faiz olmaqla kənd təsərrüfatı, meşə təsərrüfatı və balıqçılıq, dövlət idarəetməsi və müdafiə; sosial təminat, 2,4 faizi informasiya və rabitə, 1,4 faizi səhiyyə, 1,3 faizi təhsil, hər birində 0,4 faiz olmaqla ticarət; nəqliyyat vasitələrinin təmiri, inzibati və yardımçı xidmətlərin göstərilməsi, istirahət, əyləncə və incəsənət sahəsində fəaliyyət, 0,2 faizi turistlərin yerləşdirilməsi və ictimai iaşə, 0,1 faizi isə maliyyə və sığorta sahələrinə sərf edilib. Dövlət Statistika Komitəsi belə hesabat yayıb.
Novator.az-ın məlumatına görə, rəsmi hesabatda qeyd olunur ki, 9 ayda əsas kapitala 10 milyard 148,7 milyon manat vəsait yönəldilib.
Daxili mənbələrdən əsas kapitala yönəldilmiş vəsaitin dəyəri ümumi sərmayənin 60,7 faizini təşkil edib.
Neft sektoruna 4 milyard 431,4 milyon manat, qeyri-neft sektoruna 5 milyard 717,3 milyon manat qoyulub.
Xarici müəssisə və təşkilatlar əsas kapitala 3 milyard 992,4 milyon manat vəsait yönəldib. Bu vəsaitin 80,6 faizi Böyük Britaniya, İsveçrə, Türkiyə, Malayziya, ABŞ, Yaponiya, Rusiya, İran və Çexiya sərmayədarlarına məxsus olub.
