Millətlər Liqası: iki qalib məlumdur
Yığma komandaların yarışı olan UEFA Millətlər Liqasının qrup mərhələsində dörd tur arxada qalıb.
Reqlamentə görə, A divizionu qruplarının qalibləri 2019-cu ilin iyununda keçiriləcək final raunduna vəsiqə qazanır, B, C və D divizionları qruplarında qalib olanlar yuxarı diviziona çıxır, A, B, C divizionlarının zəifləri aşağı diviziona düşür.
Novator.az bildirir ki, dörd turdan sonra A divizionunun 1-ci qrupunda Fransa, 2-ci qrupunda Belçika, 3-cü qrupunda Portuqaliya, 4-cü qrupunda İspaniya öndədir.
Ukrayna B divizionunun 1-ci qrupunda qələbəni təmin edib. 2-ci qrupa Rusiya, 3-cü qrupa Bosniya, 4-cü qrupa Uels başçılıq edir.
C divizionunun 1-ci qrupunda İsrail, 2-ci qrupunda Finlandiya, 3-cü qrupunda Norveç, 4-cü qrupunda Serbiya liderdir.
Gürcüstan D divizionunun 1-ci qrupunda qələbəni təmin edib. 2-ci qrupun zirvəsində Lüksemburq, 3-cü qrupun başında Kosovo, 4-cü qrupun başında Makedoniya dayanır.
Millətlər Liqası 2020-ci ilin Avropa futbol çempionatının final mərhələsinə hər diviziondan bir vəsiqə verir. Bunun üçün 2020-ci ilin martında qrup qalibləri arasında əlavə matçlar keçiriləcək.
D divizionunun 3-cü qrupunda yarışan Azərbaycan milli komandası ikinci pillədədir. Yığma noyabrın 17-si Bakıda Farer adalarını qəbul edəcək, noyabrın 20-si Kosovonun qonağı olacaq.
