Ekspert yeni indeksin detallarından yazdı
İqtisadçı ekspert Rövşən Ağayev özünün “Facebook” səhifəsində yazılı açıqlama yayaraq Dünya İqtisadi Forumunun qlobal rəqabət qabiliyyəti indeksinə toxunub. Novator.az-ın məlumatına görə, Rövşən Ağayev yazır ki, qlobal rəqabət qabiliyyəti indeksi 12 bölmə və 93 göstərici üzrə qiymətləndirməyə əsaslanır: “2018-ci il üçün reytinqdə Azərbaycan ötən ilə nisbətən 4 pillə geriləyib və 140 ölkə arasında 69-cu yerdə qərarlaşıb. Azərbaycanın zəif mövqedə olduğu göstəricilərə diqqət yetirsək, media azadlığına görə 133-cü, inflyasiya səviyyəsinə görə 128-ci, sosial kapitala görə 123-cü, fond bazarının kapitallaşma səviyyəsinə görə 119-cu, qeyri-işlək kreditlərin səviyyəsinə görə 118-ci, büdcə şəffaflığına görə 116-cı, borclanma dinamikasına görə 111-ci, elmi məqalələrə görə 108-ci, əməkhaqqı vergisinə görə 106-cı, korrupsiyanın səviyyəsinə görə 102-ci pillədəyik”.
Ekspert qeyd edir ki, Azərbaycan özəl sektorun kreditləşmə səviyyəsinə görə qlobal rəqabət qabiliyyəti indeksində 99-cu, sağlam yaşaya bilmə müddətinə görə və elmi xərclərin səviyyəsinə görə 90-cı, yollarla əhatə səviyyəsinə görə 89-cu, audit və hesabatlılıq standartlarına görə, məktəb həyatının gözlənən davametmə müddətinə görə və genişzolaqlı mobil əlaqə səviyyəsinə görə 88-ci, patentlərə görə 87-ci, araşdırma institutlarının keyfiyyətinə görə 86-cı, hava limanlarının mövcudluğuna görə 79-cudur.
