Rəsmi: 4,8 milyon işləyən, 34,8 min nəfər işsiz var
Dövlət Statistika Komitəsi məşğulluq və işsizlik hesabatı açıqlayıb. Novator.az bildirir ki, hesabata görə, 2018-ci il oktyabrın 1-nə iqtisadi fəal əhalinin sayı 5 milyon 137,5 min nəfər olub, onların 4 milyon 885,9 min nəfərini məşğul əhali təşkil edib.
Sentyabrın 1-nə muzdla işləyənlərin sayı 1 milyon 540,3 min nəfər göstərilib. İqtisadiyyatın neft sektorunda 33,8 min nəfər, qeyri-neft sektorunda 1 milyon 506,5 min nəfər çalışıb.
Hesabata əsasən, oktyabrın 1-nə məşğulluq xidməti orqanları 34,8 min nəfərə rəsmi işsiz statusu verib. İşsizlikdən sığorta ödənişinin orta məbləği 210,6 manat olub.
Yanvar-sentyabr ayları ərzində müəssisə və təşkilatların sayı 7,3 faiz artaraq 127 min 221-ə çatıb.
Hüquqi şəxs yaratmadan sahibkarlıq fəaliyyəti ilə məşğul olmaq üçün qeydiyyatdan keçmiş fərdi sahibkarların sayı 826 mini keçib. Fərdi sahibkarların 78,5 faizi kişilər, 21,5 faizi qadınlardır.
