Ermənistanda nazir təyinatları
Ermənistanda boşalan nazir postlarına təyinatlar başa çatıb. Novator.az-ın məlumatına görə, oktyabrın 15-də prezident Armen Sərkisyan baş nazir Nikol Paşinyanın təqdimatı ilə Geqam Gevorqyanı kənd təsərrüfatı naziri, Tiqran Xaçatryanı iqtisadi inkişaf və investisiyalar naziri vəzifəsinə gətirib.
Oktyabrın 2-də 6 nazir istefaya göndərilmişdi. 4 nazirin təyinatı daha əvvəl olub. Prezident oktyabrın 4-də Feliks Solakyanı fövqəladə hallar naziri, Qaregin Baqramyanı enerji infrastrukturu və təbii sərvətlər naziri, Akob Arşakyanı nəqliyyat, rabitə və informasiya texnologiyaları naziri, oktyabrın 10-da Qabriel Kazaryanı gənclər və idman naziri təyin edib.
Bu il mayın 8-dən baş nazir postunu tutan Nikol Paşinyanın üç müavini var. Hökumət 17 nazirlikdən (Xarici İşlər; Müdafiə; Diaspor; Ədliyyə; Fövqəladə Hallar; Maliyyə; İqtisadi İnkişaf və İnvestisiyalar; Kənd Təsərrüfatı; Nəqliyyat, Rabitə və İnformasiya Texnologiyaları; Enerji İnfrastrukturu və Təbii Sərvətlər; Əmək və Sosial Məsələlər; Ərazi İdarəçiliyi və İnkişafı; Səhiyyə; Mədəniyyət; Elm və Təhsil; Gənclər və İdman; Təbiəti Mühafizə nazirlikləri) ibarətdir.
Nazirlər Kabinetinin nəzdində 5 komitə yer alır: Şəhərsalma Komitəsi; Dövlət Gəlirləri Komitəsi; Statistika Komitəsi; Daşınmaz Əmlakın Kadastrı Komitəsi; Nüvə Təhlükəsizliyi Komitəsi.
Hökumətə tabe olan 6 müfəttişlik fəaliyyət göstərir: Şəhərsalma, Texniki Təhlükəsizlik və Yanğın Təhlükəsizliyi Müfəttişliyi; Təhsil Müfəttişliyi; Təbiəti və Yerin Təkini Mühafizə Müfəttişliyi; Səhiyyə və Əmək Müfəttişliyi; Bazara Nəzarət Müfəttişliyi; Ərzaq Təhlükəsizliyi Müfəttişliyi.
Dövlət Nəzarəti Xidməti, Milli Təhlükəsizlik Xidməti və Polis birbaşa baş nazirə tabe qurumlardır.
