Evdə bərabərlik
UEFA Millətlər Liqasının qrup mərhələsində dördüncü tur start götürüb. D divizionunun 3-cü qrupunda yarışan Azərbaycan milli komandası oktyabrın 14-ü Bakıda Malta yığması ilə sülh bağlayıb – 1:1.
Novator.az-ın məlumatına görə, sona iki tur qalmış qrupa 8 xalla Kosovo başçılıq edir. Azərbaycanın 6, Farer adalarının 4, Maltanın 2 xalı var. Azərbaycan noyabrın 17-si Bakıda Farer adalarını qəbul edəcək, sonuncu matçı noyabrın 20-si Kosovoda keçirəcək.
Millətlər Liqası 2020-ci ilin Avropa futbol çempionatının final mərhələsinə hər diviziondan bir vəsiqə verir. Bunun üçün divizionlardakı qrup qalibləri arasında yarımfinal və final matçları keçiriləcək. Qrup qalibi Avropa çempionatına həmin turnirin özünün seçmə mərhələsindən düşərsə, onu Millətlər Liqasının növbəti ən yaxşı komandası əvəzləyəcək.
A divizionundakı dörd qrup qalibi Millətlər Liqasının 2019-cu ilin iyununda keçiriləcək final mərhələsinə vəsiqə qazanacaq. Bu raund yarımfinallar, üçüncü yer uğrunda oyun və finaldan ibarətdir.
B, C və D divizionlarının qrup qalibləri yuxarı diviziona çıxacaq, A, B və C divizionlarının qruplarında sonuncu olanlar aşağı diviziona düşəcək.
