“Avroviziya 2019”da azalma
Bolqarıstan “Avroviziya 2019” beynəlxalq mahnı müsabiqəsində iştirakdan imtina edib. Novator.az xəbər verir ki, oktyabrın 15-də Bolqarıstan Milli Televiziyası belə açıqlama yayıb. İmtina maliyyə problemi ilə əsaslandırılıb. Məlumata görə, qərar telekanal rəhbərliyinin büdcə xərclərini azaltmaq tədbirlərinin bir hissəsidir.
Yarışma gələn ilin mayında İsrailin baş şəhəri Tel-Əvivdə keçiriləcək. Birinci yarımfinal mayın 14-nə, ikinci yarımfinal mayın 16-na, final mayın 18-nə təyin olunub.
“Avroviziya 2019” mahnı müsabiqəsində iştiraka ev sahibindən savayı 38 ölkə razılıq verib: Albaniya, Almaniya, Avstraliya, Avstriya, Azərbaycan, Belarus, Belçika, Böyük Britaniya, Çexiya, Danimarka, Ermənistan, Estoniya, Finlandiya, Fransa, Gürcüstan, Xorvatiya, İrlandiya, İslandiya, İspaniya, İsveç, İsveçrə, İtaliya, Kipr, Latviya, Litva, Macarıstan, Makedoniya, Malta, Monteneqro, Norveç, Niderland, Polşa, Portuqaliya, Rumıniya, Serbiya, Sloveniya, Ukrayna, Yunanıstan.
1956-cı ildən keçirilən “Avroviziya” yarışı ictimai teleradioları cəmləşdirən Avropa Yayım Birliyinin layihəsidir.
Səidə Hüseynova
