Uğurlu səfər
Azərbaycan yığması UEFA Millətlər Liqasının qrup mərhələsində üçüncü oyununu keçirib. Novator.az-ın məlumatına görə, D divizionunun 3-cü qrupunda yer alan yığma oktyabrın 11-i səfərdə Farer adalarını 3:0 hesabı ilə məğlub edib.
Üç turdan sonra qrupa 7 xalla Kosovo başçılıq edir. Azərbaycanın 5, Farer adalarının 3, Maltanın 1 xalı var.
Azərbaycan milli komandası oktyabrın 14-də Maltanı, noyabrın 17-də Farer adalarını qəbul edəcək. Hər iki görüş Bakıda olacaq. Sonuncu matç noyabrın 20-si Kosovoda keçiriləcək.
Millətlər Liqası 2020-ci ilin Avropa futbol çempionatının final mərhələsinə hər diviziondan bir vəsiqə verir. Bunun üçün divizionlardakı qrup qalibləri arasında yarımfinal və final matçları keçiriləcək. Qrup qalibi Avropa çempionatına həmin turnirin özünün seçmə mərhələsindən düşərsə, onu Millətlər Liqasının növbəti ən yaxşı komandası əvəzləyəcək.
A divizionundakı dörd qrup qalibi Millətlər Liqasının 2019-cu ilin iyununda keçiriləcək final mərhələsinə vəsiqə qazanacaq. Bu raund yarımfinallar, üçüncü yer uğrunda oyun və finaldan ibarətdir.
B, C və D divizionlarının qrup qalibləri yuxarı diviziona çıxacaq, A, B və C divizionlarının qruplarında sonuncu olanlar aşağı diviziona düşəcək.
