Amerikalı din xadimi azadlığa çıxdı
Oktyabrın 12-də İzmirdəki 2-ci Ağır Cəza Məhkəməsi ABŞ vətəndaşı, protestant din xadimi Endrü Bransona hökm oxuyub. Novator.az-ın məlumatına görə, 3 il 1 ay 15 gün müddətinə həbs cəzası alan müttəhim sərbəst buraxılıb.
50 yaşlı Endrü Branson 23 ildir Türkiyədə yaşayır. O, 2016-cı ilin sonlarında Türkiyədə həbs edilib. Bu ilin iyul ayından ev dustağı idi. Oktyabrın 12-də məhkəmə onun buraxılmasına qərar verərkən 2016-cı ilin sonundan 2018-ci ilin iyul ayına qədər həbsdə olduğunu nəzərə alıb.
Endrü Branson casusluqda, FETÖ və PKK terror təşkilatlarına dəstəkdə təqsirli bilinir. Bu ittihamlar ABŞ-Türkiyə münasibətlərini kəskin pisləşdirib. Vaşinqtonun tətbiq etdiyi sanksiyalar nəticəsində Türkiyənin milli pulu dəyər itirib, ölkədə ağır iqtisadi durum yaranıb.
2016-cı il iyulun 15-də bir qrup hərbçi Türkiyədə hakimiyyəti ələ almaq təşəbbüsü göstərib. Yüzlərlə adamın həlak olduğu qiyam yatırılıb. Hakimiyyət çevriliş cəhdinin ABŞ-da mühacirətdə olan islamçı alim Fətullah Gülənin planı olduğunu iddia edib.
