İstefa günü açıqlandı
Ermənistanın baş naziri Nikol Paşinyan istefa verəcəyi günü açıqlayıb. Novator.az-ın məlumatına görə, Nikol Paşinyan “France24” telekanalına müsahibəsində oktyabrın 15-də istefa vermək niyyətində olduğunu deyib. O qeyd edib ki, növbədənkənar parlament seçkisinin dekabrın 10-da keçirilməsini istəyir.
Ermənistan Konstitusiyasına əsasən, baş nazir istefa verdikdən sonra parlament iki həftə ərzində hökumətin yeni başçısını seçməlidir. Əks halda qanunverici orqan buraxılır. Nikol Paşinyanın planına əsasən, o, istefa verərkən baş nazir səlahiyyətlərinin icraçısı olaraq qalır, iki həftə ərzində parlament yeni baş naziri seçmir və buraxılır, dekabr ayına növbədənkənar seçki təyin olunur.
İndiki parlament 2017-ci ilin yazında seçilib. Nikol Paşinyanın sədrlik etdiyi Vətəndaş Sazişi Partiyasının və müttəfiqlərinin yaratdığı “Çıxış” bloku parlamentdə 9 mandata sahibdir. Sabiq prezident Serj Sərkisyanın Respublika Partiyasının parlament fraksiyası 51 nəfərdən, böyük əksəriyyəti Çiçəklənən Ermənistan Partiyasının üzvləri olan Sarukyan bloku 31 nəfərdən, Daşnaksütun Partiyasının fraksiyası 7 nəfərdən ibarətdir. 7 deputat heç bir fraksiyaya qatılmır.
2008-ci ildən prezident postunu tutan Serj Sərkisyan bu il aprelin 17-də baş nazir kürsüsünə oturub, ancaq xalq etirazlarına görə aprelin 23-də istefa verməyə məcbur olub. Xalq etirazlarına Nikol Paşinyan başçılıq edib. O, mayın 8-dən baş nazir postunu tutur.
Nikol Paşinyan 1975-ci il iyunun 1-də İcevan şəhərində doğulub. 1993-cü ildən jurnalist fəaliyyəti ilə məşğul olub. 2009-2011-ci illərdə həbsdə yatıb. 2012 və 2017-ci illərdə parlamentin deputatı seçilib.
