Dünyanı çirkləndirən şirkətlər
“Qrinpis” beynəlxalq ekoloji təşkilatı ətraf mühiti ən çox çirkləndirən şirkətlərin adlarını açıqlayıb. Novator.az-ın məlumatına görə, təşkilat 6 qitənin 42 ölkəsində 200 yoxlama aparıb. Yoxlamaya cəlb olunan könüllülər şəhər parklarında, digər ictimai yerlərdə, habelə sahillərdə topladıqları plastik qabların hansı şirkətin istehsalı olduğunu müəyyən ediblər. 10 mindən çox könüllünün cəlb olunduğu aksiya “#Breakfreefromplastic” şirkəti çərçivəsində aparılıb.
Aksiya zamanı 188 min ədəd plastik tullantı toplanıb. Yoxlama aparılan nöqtələrin 75%-ndə ABŞ-ın “Koka-Kola” şirkətinin məhsullarına aid plastik qablar tapılıb. Toplanmış tullantıların 14%-i bu şirkətin məhsullarına, o cümlədən “PepsiCo” və “Nestle” brendlərinə məxsus olub.
Yoxlamanın nəticələrinə görə, dünyanı ən çox çirkləndirən digər transmilli brendlər bunlardır: “Danone”, “Mondelez İnternational”, “Procter & Gamble”, “Unilever”, “Perfetti van Melle”, “Mars İncorporated” və “Colgate-Palmolive”.
Səidə Hüseynova
