Milli çempionatlarda vəziyyət
Avropanın milli futbol çempionatları qısa fasiləyə çıxıb. Novator.az-ın məlumatına görə, İngiltərə çempionatında 8 turdan sonra “Mançester Siti”, “Çelsi” və “Liverpul” 20 xalla öndə sıralanırlar. Bu komandaları izləyən “Arsenal” və “Tottenhem”in 18 xalı var.
8 turu geridə qalan İspaniya çempionatında “Sevilya” 16 xalla liderdir. “Barselona” və “Atletiko” 15 xal, “Real”, “Espanyol” və “Alaves” 14 xal yığıb.
Almaniya çempionatında 7 tur oynanıb, Dortmund “Borussiya”sı 17 xalla ilk pillədədir. “Leypsiq”, “Borussiya” (Mönhenqladbah), “Verder” və “Herta” zirvə sahibini 14 xalla təqib edir. “Bavariya” 13 xal toplaya bilib.
İtaliya çempionatında 8 turun ardından 24 xalla “Yuventus” birincidir. 18 xalı olan “Napoli” ikinci pillədə dayanır. “İnter” 16 xal, “Latsio” 15 xal götürüb.
Fransa çempionatında 9 tur arxada qalıb. Turnir cədvəlinə 27 xalla PSJ başçılıq edir. “Lill” 19 xal, “Marsel” və “Monpelye” 16 xal toplayıb.
