Jurnalist öldürülüb
Bolqarıstanın TVN televiziyasının inzibati direktoru və aparıcısı Viktoriya Marinova öldürülüb. Jurnalistin meyiti oktyabrın 7-si Ruse şəhərində, parkda tapılıb. 30 yaşlı Viktoriya Marinovanın başına zərbə vurulduğu, zorlandığı, sonra boğulduğu xəbər verilir. Onun mobil telefonu, maşınının açarları, eynəyi yoxa çıxıb.
Novator.az bildirir ki, istintaq Viktoriya Marinovanın jurnalist fəaliyyətinə görə öldürüldüyünü güman edir. Araşdırmaları ilə tanınan jurnalistin son işlərindən biri Avropa İttifaqı fondlarında fırıldaqlar məsələsinin təhqiqatını aparan iki həmkarından “Detektor” proqramı üçün müsahibə götürməsi olub.
Son bir ildə Avropa İttifaqında daha iki jurnalist öldürülüb. Ötən ilin oktyabrında maltalı jurnalist Dafne Karuana Qalisiya terror aktında həyatını itirib. Bu ilin fevral ayında isə slovakiyalı jurnalist Yan Kuçak və onun vətəndaş nikahında olduğu xanım qətlə yetiriliblər.
