Gürcüstan: idxal ixracı üstələyir
Gürcüstanda 2018-ci ilin 8 ayı üzrə xarici ticarət hesabatı açıqlanıb. Novator.az xəbər verir ki, hesabata əsasən, yanvar-avqust aylarında ölkənin xarici ticarət dövriyyəsi 2017-ci ilin eyni dövrü ilə müqayisədə 22,6% artaraq 8,1 milyard dollara çatıb.
8 ayda Gürcüstandan 2,1 milyard dollarlıq məhsul ixrac olunduğu bildirilir. Bu, 2017-ci ilin 8 ayı ilə müqayisədə 27,1% çoxdur.
Rəsmi məlumata görə, ilin əvvəlindən Gürcüstana 6 milyard dollar həcmində məhsul idxal olunub. Bu, 2017-ci ilin yanvar-avqust ayları ilə müqayisədə 21% yüksək göstəricidir.
Hesabatda qeyd olunur ki, ixracın əsas hissəsini mis filizi və qarışığı, minik avtomobilləri, təbii üzüm şərabı, dərman vasitələri, mineral sular, qızıl təşkil edir.
İdxala gəlincə, Gürcüstanın xaricdən ən çox neft və neft məhsulları, minik avtomobilləri, taxıl, elektrik enerjisi, dərman vasitələri və mobil telefon vasitələri aldığı vurğulanır.
Səidə Huseynova
