Dollarda sabitlik 7 ayı geridə qoydu
ABŞ dollarının rəsmi qiymətində sabitlik 7 ayı geridə qoyub. Oktyabrın 8-də Mərkəzi Bank dolları yenə 1,7 manata təklif edir. Bu kurs martın 7-dən dəyişmir.
Bir çox valyutanın rəsmi kursu isə yüksəlib. Novator.az-ın məlumatına görə, bahalaşan avro 1,9571, ingilis funt sterlinqi 2,229, Rusiya rublu 0,0255, türk lirəsi 0,2768 manata satılır.
Dəyər itirən Çin yuanına 0,2464, gürcü larisinə 0,6485 manat qiymət qoyulub (Məzənnələr).
2015-ci il fevralın 21-də başlayan devalvasiya prosesi ilə ABŞ dollarının rəsmi kursu 0,7844 manatdan 1,5594 manata qalxıb. 2016-cı ilə 1,7707 manatla nöqtə qoyulub. 2017-ci il 1,7001 manatla başa çatıb və həmin kurs 2018-ci il martın 7-dək qüvvədə olub.
Kursu qorumaq üçün Mərkəzi Bankın yanvar-sentyabr aylarında keçirdiyi valyuta hərraclarında Dövlət Neft Fondu 4 milyard 639,6 milyon ABŞ dolları məbləğində vəsait satıb.
