Ermənistan hökumətindən kimlər getdi?
Novator.az oktyabrın 2-də Ermənistan hökumətindən gedən şəxslərin siyahısına nəzər salıb.
Ötən gün axşam Ermənistan parlamenti öz reqlamentinə dəyişiklik layihəsi qəbul edib. Yeniliyə görə, yetərsayın olmadığı və ya deputatların iclaslarda iştirakına maneə törədildiyi hallarda qanunverici orqan iclasını başqa vaxta keçirə bilər. Baş nazir Nikol Paşinyan reqlamentdəki yeniliyin parlamentin buraxılmasının qarşısını almağa yönəldiyini bəyan edərək buna qarşı çıxıb. Dəyişiklik sabiq prezident Serj Sərkisyanın sədrlik etdiyi Respublika Partiyasının təşəbbüsü olub. Parlamentdə keçirilən səsvermədə Çiçəklənən Ermənistan Partiyası və Daşnaksütun Partiyasından bəzi deputatlar da yeniliyə tərəfdar olublar. Bundan sonra prezident Armen Sərkisyan Nikol Paşinyanın təqdimatını nəzərə alaraq bu iki partiyanın hökumətdəki təmsilçilərini vəzifədən çıxarıb.
Novator.az bildirir ki, kənd təsərrüfatı naziri postunu itirən Artur Xaçatryan, iqtisadi inkişaf və investisiyalar naziri vəzifəsindən gedən Arsvik Minasyan Daşnaksütun Partiyasının üzvləridir.
İstefaya göndərilən digər şəxslər Çiçəklənən Ermənistan Partiyasının təmsilçiləridir. Qraçya Rostamyan fövqəladə hallar naziri postunu, Artur Qriqoryan enerji infrastrukturu və təbii sərvətlər naziri postunu, Levon Vaqradyan gənclər və idman naziri postunu, Aşot Akobyan nəqliyyat, rabitə və informasiya texnologiyaları naziri postunu itirib.
Çiçəklənən Ermənistan Partiyasından Mger Qriqoryan baş nazirin müavini vəzifəsində qalmaq istədiyi üçün Nikol Paşinyan onunla bağlı təqdimat verməyib.
