Modriçin mükafatı
Xorvatiyalı yarımmüdafiəçi Luka Modriç FİFA-nın sorğusunda ilin ən yaxşı futbolçusu seçilib. 2017-ci ilin iyulundan 2018-ci ilin iyuluna qədər olan dövrü əhatə edən sorğuya milli komandaların baş məşqçiləri, kapitanları və FİFA-ya üzv ölkələrin hərəsindən bir jurnalist qatılıb.
Novator.az-ın məlumatına görə, Azərbaycan milli komandasının baş məşqçisi Qurban Qurbanov ən yaxşı futbolçu kimi fransalı Antuan Qrizmanı göstərib. Kapitan Kamran Ağayevin seçimi portuqaliyalı Kriştiano Ronaldo olub. Jurnalist Rasim Mövsümzadə isə Luka Modriçə səs verib.
Mükafatlandırma mərasimi sentyabrın 24-ü Londonda keçirilib.
Luka Modriç 1985-ci ildə Xorvatiyanın Zadar şəhərində anadan olub. Xorvatiyanın “Dinamo”, “İnter”, Bosniyanın “Zrinski”, İngiltərənin “Tottenhem” klublarında çıxış edib.
2012-ci ildən Luka Modriç İspaniya paytaxtı Madridin “Real” klubunda oynayır.
Luka Modriç 2006-cı ildən Xorvatiya milli komandasının da şərəfini qoruyur.
Üçqat Xorvatiya çempionu, İspaniya çempionudur.
4 dəfə Çempionlar Liqasının qalibi olub, 3 dəfə UEFA superkubokunu əldə edib, 3 dəfə klublar arasında dünya çempionluğunu qazanıb.
2018-ci ilin dünya çempionatının gümüş mükafatçısıdır.
