Erməni fondunda yeni rəhbər
Dünya ermənilərini birləşdirən “Ayastan” fonduna yeni icraçı direktor təyin edilib. Novator.az-ın məlumatına görə, bu postu Ermənistanın baş naziri Nikol Paşinyanın müşaviri Aykak Arşamyan tutub. İcraçı direktorun səlahiyyət müddəti üç ildir.
“Ayastan”ın əvvəlki icraçı direktoru Ara Vardanyan bu il iyulun 10-da fondun vəsaitlərini şəxsi məqsədlər üçün istifadə ittihamları fonunda istefa verib. İyulun 11-də Himayəçilik Şurasının üzvü, Fransa bölməsinin rəhbəri Petros Terzyan müvəqqəti rəhbər təyin olunmuş, icraçı direktor seçimi üçün müsabiqə komissiyası yaradılmışdı.
İcraçı direktor postuna müsabiqə müddətində Ermənistan, Rusiya, ABŞ, Böyük Britaniya, Fransa, İsveçrə və Livandan 42 ərizə daxil olub, sonda Himayəçilik Şurası Aykak Arşamyanı üstün bilib.
Heç bir partiyanın üzvü olmayan Aykak Arşamyan baş nazirin müşaviri postunu 2018-ci ilin iyulundan tutur.
1971-ci il təvəllüdlü Aykak Arşamyan tarix elmləri namizədidir. Yerevan Dövlət Universitetinin müəllimi olub, Elm və Təhsil Nazirliyində, Xarici İşlər Nazirliyində çalışıb.
1992-ci ildə yaradılmış “Ayastan” fondu indiyədək Ermənistanda və Dağlıq Qarabağda müxtəlif layihələr üçün 350 milyon dollara yaxın vəsait toplayıb. Qurumun Himayəçilik Şurasına Ermənistan prezidenti başçılıq edir.
Səidə Hüseynova
