2019-un büdcə paketi prezidentə ötürüldü
Nazirlər Kabinetinin 24 sentyabr iclasında 2019-cu ilin dövlət büdcəsinin və icmal büdcənin layihələri, sonrakı üç il üçün icmal büdcənin göstəriciləri, 2019-cu il və gələn üç il üzrə sosial-iqtisadi inkişaf konsepsiyası və proqnoz göstəriciləri müzakirə edilib. Rəsmi məlumata görə, iclasa sədrlik edən baş nazir Novruz Məmmədov gələn ilin dövlət büdcəsi layihəsinin dünyada gedən qlobal maliyyə-iqtisadi proseslər nəzərə alınmaqla tərtib edildiyini deyib. O qeyd edib ki, layihənin hazırlanmasında dövlət büdcəsinin sosial yönümlü olması əsas götürülüb, qeyri-neft sektorunun inkişafına dəstək verilməsi, dövlətin müdafiə qüdrətinin və təhlükəsizliyinin təmin edilməsi amillərinə diqqət yetirilib.
Maliyyə nazirinin və iqtisadiyyat nazirinin müavininin məruzələrindən sonra büdcə zərfinə daxil olan sənədlər toplusunun prezidentə təqdim edilməsi qərara alınıb.
Novator.az xatırladır ki, 2018-ci ilin dövlət büdcəsinin gəlirləri 22 milyard 149 milyon manat, xərcləri 23 milyard 100 milyon manat müəyyən edilib. Büdcədə müdafiə üçün 2,9 milyard manat, sosial müdafiə və sosial təminat üçün 2,3 milyard manat, təhsil üçün 2 milyard 43,9 milyon manat, səhiyyə üçün 739,3 milyon manat xərc nəzərdə tutulub.
