Dövlət Turizm Agentliyinin statusu
Prezident İlham Əliyev fərman imzalayaraq Dövlət Turizm Agentliyinin strukturunu və əsasnaməsini təsdiqləyib. Agentlik mərkəzi aparatdan (şöbələr, sektorlar) və regional turizm idarələrindən ibarətdir. Aparat işçilərinin say həddi 55 ştat vahidi müəyyən edilib.
Novator.az bildirir ki, Dövlət Turizm Agentliyi bu il aprelin 20-də Mədəniyyət və Turizm Nazirliyinin bölünməsi ilə yaradılıb. Aprelin 23-də Fuad Nağıyev Dövlət Turizm Agentliyinin sədri təyin olunub.
Əsasnaməyə görə, Dövlət Turizm Agentliyi turizm sahəsində, habelə tabeliyindəki dövlət qoruqlarının ərazilərində yerləşən tarix və mədəniyyət abidələrinin qorunması sahəsində dövlət siyasətini və tənzimləməsini həyata keçirən mərkəzi icra hakimiyyəti orqanıdır.
Agentlik sədrinin bir müavini var. Onu vəzifəyə prezident təyin edir. Qurumda sədrdən, sədrin müavinindən, Naxçıvan Muxtar Respublikası Turizm Departamentinin direktorundan və agentliyin rəhbər işçilərindən ibarət kollegiya yaradılır. Kollegiyanın tərkibinə mütəxəssislər və alimlər də daxil edilə bilər.
