UEFA-nın klub reytinqi
Novator.az UEFA klub reytinqindəki vəziyyətə nəzər salıb.
Reytinq UEFA üzvlərinin Çempionlar Liqası və Avropa Liqasında son beş mövsümdə qazandığı əmsala əsaslanır. Qrup raunduna qədər qələbə 1, heç-heçə yarım xal; qrupda və sonrakı mərhələlərdə qələbə 2, heç-heçə 1 xaldır. Çempionlar Liqasının qrupuna düşmək 4 bonus xalı, 1/8 finala çıxmaq 5 bonus xalı, hər iki turnirin 1/4 finalına, yarımfinalına və finalına yüksəlmək 1 bonus xalı verir. Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
237 klubun buraxıldığı 2018-2019 mövsümünü Çempionlar Liqasında 32, Avropa Liqasında 48 komanda davam etdirir. Novator.az bildirir ki, hazırda 1 komanda ilə yarışan Azərbaycan bu mövsüm 1,875 əmsal toplaya bilib. Mövsümə 5,500 əmsalla Serbiya başçılıq edir. Şotlandiya 4,750 əmsalla ikinci, İspaniya 4,571 əmsalla üçüncüdür.
Təmsilçiləri mübarizədə qalan Belarus 3,500 əmsal, Qazaxıstan 3,000 əmsal, Rusiya 2,916 əmsal, Türkiyə 2,700 əmsal, Ukrayna 2,200 əmsal yığıb.
Azərbaycan son beş mövsüm üzrə 18,500 əmsalla 55 UEFA üzvü arasında 26-cı pillədə durur.
Klub reytinqinə İspaniya başçılıq edir: 88,569 əmsal. Onu İngiltərə (66,748 əmsal), İtaliya (66,297 əmsal), Almaniya (61,070 əmsal), Fransa (51,498 əmsal) izləyir.
