İcazəsiz ov: əcnəbilər cərimələnib, azərbaycanlıdan tüfəng götürülüb
Sentyabrın 20-də Salyan rayonunun Kalmas adlanan ərazisində icazəsiz ova cəhd edən əcnəbilər saxlanılıb.
Ekologiya və Təbii Sərvətlər Nazirliyinin mətbuat xidmətindən Novator.az-a bildiriblər ki, əcnəbiləri nazirliyin 3 saylı Regional Ekologiya və Təbii Sərvətlər İdarəsinin əməkdaşları saxlayıblar.
Araşdırma zamanı məlum olub ki, ova cəhd edənlər Bəhreyn Krallığının vətəndaşı Məhəmməd Əli əl-Mərri və Pakistan İslam Respublikasının vətəndaşı Faesal Şahdır. Onlardan quş ovlamaq üçün ləvazimatlar götürülüb və hər biri inzibati qaydada 2000 manat məbləğində cərimələnib.
Nazirliyin mətbuat xidməti Novator.az-a daha bir icazəsiz ova cəhdin qarşısının alındığını xəbər verib. Həmin cəhd Qızılağac Dövlət Təbiət Qoruğunda olub. Qoruğun əməkdaşları Masallı rayonunun Ərəb kənd sakini Vasif Dövlətovu saxlayıblar.
Vasif Dövlətov barəsində akt, protokol tərtib edilib və inzibati qaydada 1000 manat məbləğində cərimə tətbiq olunub. Ondan ov tüfəngi və patron götürülüb.
