Yerevan seçkisi ilə bağlı sorğunun nəticələri
Newsarmenia.am saytı Yerevan meri postuna namizədlərlə bağlı sorğunun nəticələrini açıqlayıb. Portalın “Facebook” səhifəsində keçirilmiş sorğuya 434 nəfərin qatıldığı bildirilir.
Sentyabrın 23-də Yerevan Şəhər Şurasına seçki keçiriləcək. Seçkidə 12 ictimai-siyasi qüvvə iştirak edir. Proporsional üsulla seçilən 65 yerlik Şəhər Şurasında mandatların yarıdan çoxunu götürən qüvvənin siyahısındakı ilk şəxs mer postunu tutacaq. Heç bir qüvvə mandatların yarıdan çoxunu əldə etməsə, meri Şəhər Şurası seçəcək.
Partiyalar Şəhər Şurasında təmsil olunmaq üçün azı 6 faiz, bloklar 8 faiz səs toplamalıdır.
Novator.az-ın məlumatına görə, Newsarmenia.am saytının sorğusunda baş nazir Nikol Paşinyanın dəstəklədiyi “Mənim addımım” bloku 34 faizlə qalib gəlib. Blokun namizədlərinin siyahısında 1976-cı il təvəllüdlü aktyor Ayk Marutyan birincidir.
Mer postuna Artak Zeynalyanı namizəd göstərən İşıq bloku 19 faiz səslə ikinci yeri tutub. Artak Zeynalyan 1969-cu ildə doğulub. Ədliyyə naziridir.
Sorğuya qatılanların 15 faizi Çiçəklənən Ermənistan Partiyasına dəstək verib. Bu blokun siyahısına 1965-ci il təvəllüdlü deputat Naira Zöhrabyan başçılıq edir.
Qalan iddiaçılar bunlardır: Daşnaksütun Partiyası (siyahısına Mikael Manukyan başçılıq edir), Əriklər Ölkəsi Partiyası (Zarui Postancyan), Yerevan ictimaiyyəti bloku (Anait Tərxanyan), İrs Partiyası (Raffi Ovannisyan), Yerevanlılar bloku (Ararat Zurabyan), Qanunçuluq Ölkəsi Partiyası (Mger Şahgeldyan), Demokratik Yol Partiyası (Manuel Qasparyan), Ayk Partiyası (Gevorq Ovsepyan), İslahatçılar Partiyası (Artak Avetyan).
Armeniasputnik.am saytının mer postuna iddia edən namizədlərlə bağlı internet sorğusunda da “Mənim addımım” bloku öndədir: 35,2 faiz.
