Nazir bölmələrin döyüşə hazırlığını yoxlayıb
Azərbaycanın müdafiə naziri Zakir Həsənov sentyabrın 18-i qoşunların təmas xəttində, yüksək dağ zirvələrində yerləşən bölmələrin döyüşə hazırlığını yoxlayıb. Mod.gov.az-ın məlumatına görə, cəbhənin bu istiqamətindəki əməliyyat şəraiti barədə ətraflı məruzələri dinləyən nazir üzbəüz yerləşən düşmən mövqelərini müşahidə edib.
Bölmələrdə hərbi qulluqçuların döyüş və mənəvi-psixoloji hazırlığı, onların sosial-məişət şəraiti ilə maraqlanan müdafiə naziri qış mövsümünə zəruri hazırlıq işlərinin vaxtında və keyfiyyətlə icra edilməsi barədə tapşırıqlar verib.
Hərbi xidmətin və döyüş növbətçiliyinin təşkilini yoxlayan Zakir Həsənov xidmətdə fərqlənən bir qrup hərbçiyə ali baş komandan adından qiymətli hədiyyələr təqdim edib.
