Kabinetin rəsmi portalı yenilənib
Nazirlər Kabinetinin rəsmi portalı Cabmin.gov.az dizaynını dəyişib. Novator.az-ın məlumatına görə, rəsmi saytda Azərbaycan, Xəbərlər, Sənədlər, Rəhbərlik, Nazirlər Kabineti, Nazirlər Kabinetinin Aparatı, Müraciətlər, Əlaqə bölmələri yenilənib.
Azərbaycan bölməsində tarixi arayış verilir, ölkə konstitusiyasının mətni, dövlət rəmzləri, ərazi məsələləri, Dağlıq Qarabağ münaqişəsi haqda bilgilər yer alır. Bölmədə iqtisadi göstəricilərə nəzər salmaq imkanı da yaradılıb.
Xəbərlər bölməsində görüşlər, tədbirlər, səfərlər, mətbuat xidmətinin məlumatları təqdim olunur.
Sənədlər bölməsində Nazirlər Kabinetinin qərarları və rəsmi məktublarla tanış olmaq mümkündür.
Rəhbərlik bölməsində baş nazirin və onun müavinlərinin bioqrafiyası yerləşdirilib.
Nazirlər Kabineti bölməsində status, səlahiyyətlər, iş qaydası haqqında bilgilər var. Bu bölmədə Nazirlər Kabinetinin tərkibi ilə tanış olmaq və mərkəzi icra hakimiyyəti orqanlarının saytlarına keçid etmək də mümkündür.
Nazirlər Kabinetinin Aparatı bölməsində qurumun rəhbəri, strukturu, əsasnaməsi haqda bilgilər var.
Müraciətlər bölməsində Nazirlər Kabinetində qəbul günləri yer alıb, qəbula yazılmaq və müraciət etmək imkanları yaradılıb, eyni zamanda vətəndaşların müraciətlərinə dair qanunvericiliklə tanış olmaq imkanı verilib.
Prezidentin yuxarı icra orqanı olan Nazirlər Kabinetinin tərkibinə baş nazir, onun müavinləri, nazirlər və başqa mərkəzi icra hakimiyyəti orqanlarının rəhbərləri daxildir.
