Sərmayənin detalları
2018-ci ilin yanvar-avqust aylarında xarici müəssisə və təşkilatlar Azərbaycana 3 milyard 631,1 milyon manat sərmayə qoyub. Novator.az-ın məlumatına görə, Dövlət Statistika Komitəsi bildirir ki, xarici ölkələr və beynəlxalq təşkilatların vəsaitləri hesabına yönəldilmiş vəsaitin 80,4 faizi Böyük Britaniya, İsveçrə, Türkiyə, Malayziya, ABŞ, Yaponiya, Rusiya, İran və Çexiya sərmayədarlarına məxsus olub.
Ümumilikdə 8 ayda əsas kapitala 8 milyard 953,6 milyon manat vəsait yönəldilib. Daxili mənbələrdən ayrılan vəsait ümumi sərmayənin 59,4 faizini təşkil edib.
İstifadə olunmuş vəsaitin 69,6 faizi məhsul istehsalı obyektlərinin, 22,9 faizi xidmət sahələri üzrə obyektlərin, 7,5 faizi yaşayış evlərinin tikintisinə sərf olunub.
Sərmayənin 51,5 faizini dövlət, 48,5 faizini qeyri-dövlət sektoru təmsilçiləri qoyub.
Əsas kapitala yönəldilmiş sərmayədə müəssisə və təşkilatların vəsaitləri 4 milyard 627,8 milyon manat, bank kreditləri 1 milyard 320,4 milyon manat, büdcə vəsaitləri 2 milyard 259 milyon manat, büdcədənkənar fondların vəsaitləri 149,8 milyon manat, əhalinin şəxsi vəsaitləri 532,8 milyon manat, digər vəsaitlər 63,8 milyon manat göstərilir.
