Müdafiə nazirindən tapşırıqlar
Müdafiə naziri general-polkovnik Zakir Həsənov sentyabrın 17-də təlimlər keçirilən bölgəyə gedib. Mod.gov.az-ın məlumatına görə, Zakir Həsənov müxtəlif poliqonlar və təlim sahələrində keçirilən təlimin ssenarisinə uyğun olaraq qarşıya qoyulan məqsəd və vəzifələr barədə məruzələri dinləyib. Ali baş komandanın Azərbaycan Ordusu qarşısında qoyduğu müvafiq tapşırıqları komandir-rəis heyətinə və təlim iştirakçılarına bir daha çatdıran müdafiə naziri genişmiqyaslı əməliyyat-taktiki təlimlərin təşkili və keçirilməsi ilə bağlı müvafiq göstərişlər verib.
Həmin gün Zakir Həsənov cəbhə boyu zonada yerləşən bölmələrə baş çəkib, şəxsi heyətin döyüşə hazırlıq vəziyyətini yoxlayıb. Azərbaycan-Ermənistan dövlət sərhədində atəşə məruz qalan yaşayış məntəqələri istiqamətindəki bölmələrdə olan nazir vəziyyətlə bağlı məruzələri dinlədikdən sonra qarşı tərəfin mövqelərini müşahidə edib.
Ön xətt mövqelərindəki vəziyyətlə yerində tanış olan nazir dinc əhalinin atəşə tutulmasına qarşı təxirəsalınmaz cavabın verilməsi və daha sərt tədbirlərin görülməsi ilə bağlı konkret tapşırıqlar qoyub.
Sentyabrın 17-də Azərbaycan Ordusunun müxtəlif qoşun növləri, qisimləri, birlik və birləşmələri genişmiqyaslı əməliyyat-taktiki təlimlərə başlayıb. Təlimlərə 20 mindən artıq şəxsi heyət, 200-dən çox tank və digər zirehli texnika, 120-dən çox müxtəlif çaplı raket və artilleriya qurğusu, yaylım atəşli reaktiv sistemləri və minaatan, 10-dək qırıcı və bombardmançı, 20-dək müxtəlif təyinatlı ordu aviasiyası cəlb olunub.
