Hikmət Hacıyev Prezident Administrasiyasına təyinat alıb
Xarici İşlər Nazirliyinin mətbuat xidmətinin rəhbəri Hikmət Hacıyev Prezident Administrasiyasının xarici siyasət məsələləri şöbəsinin müdir müavini təyin olunub.
Hikmət Hacıyev 2014-cü ildən Xarici İşlər Nazirliyinin sözçüsü idi.
Nazirliyin mətbuat xidmətinə yeni rəhbərin təyin olunduğu barədə hələ ki, məlumat yoxdur.
Prezident Administrasiyasının xarici siyasət məsələləri şöbəsinin müdiri postu aprelin 21-dən – həmin vəzifəni tutmuş Novruz Məmmədov baş nazir təyin olunandan vakantdır. Buna görə də KİV-də Hikmət Hacıyevin faktiki olaraq xarici siyasət məsələləri şöbəsinə rəhbərliyi həyata keçirəcəyi vurğulanır.
Hikmət Hacıyev 1979-cu ildə Gəncədə doğulub. Bakı Dövlət Universitetində beynəlxalq münasibətlər ixtisasına yiyələnib, həmçinin Belçikada təhsil alıb. 2000-ci ildən Xarici İşlər Nazirliyində işləyib.
