Cəbhəçi gəncə hökm oxundu
AXCP Gənclər Komitəsinin üzvü Orxan Baxışlı 6 il müddətinə azadlıqdan məhrum edilib. Hökm sentyabrın 18-i Bakı Ağır Cinayətlər Məhkəməsində çıxarılıb.
Gənc fəal Cinayət Məcəlləsinin 234.4.3-cü (satış məqsədilə külli miqdarda narkotik əldə etmə, daşıma və ya saxlama) maddəsi ilə təqsirli bilinib.
Sentyabrın 13-də keçirilən məhkəmə prosesində dövlət ittihamçısı Orxan Baxışlının 7 il müddətinə azadlıqdan məhrum olunmasını təklif etmişdi.
18 sentyabr prosesində son söz söyləyərkən Orxan Baxışlı həbsinin siyasi sifariş olduğunu vurğulayıb və bu həbsi mübarizəsinin növbəti mərhələsi kimi qiymətləndirib.
“Amerikanın səsi” xəbər verir ki, gənc fəal hökmə “Azadlıq!” deyə reaksiya verib.
Orxan Baxışlının anası Kəmalə Rəhimli “Amerikanın səsi”nə deyib ki, oğlunun həbsi siyasi sifarişdir: “Oğlum siyasi fəaliyyətinə görə uydurma ittihamla həbs edilib. Məhkəmədə oğlumun günahı sübuta yetirilmədi”.
Orxan Baxışlı mayın 6-sı Bakıda tutulub. Mayın 8-də Yasamal Rayon Məhkəməsi onun barəsində həbs qətimkan tədbiri seçib.
Həbsindən bir neçə gün əvvəl – mayın 3-də Orxan Baxışlı 2005-ci ildə öldürülən jurnalist Elmar Hüseynovun Qurd qapısı qəbiristanlığındakı məzarı üstündə çıxış edib. Beynəlxalq Söz və Mətbuat Azadlığı Gününə həsr olunmuş ziyarətdə gənc fəal Elmar Hüseynovun qətlində hakimiyyəti günahlandırıb. AXCP fəalları həbsi bu çıxışla bağlayırlar. Hüquq mühafizə orqanları isə gənc fəalın üstündən 6 qram heroin çıxdığını bəyan edib.
