Bayrama dəvət
Ermənistanın hər üç sabiq dövlət başçısı sentyabrın 21-də qeyd olunacaq Müstəqillik Günü tədbirlərinə dəvət edilir. Novator.az-ın məlumatına görə, bunu sentyabrın 18-də baş nazir aparatının rəhbəri Eduard Ağacanyan bəyan edib. O, hökumətin keçirəcəyi rəsmi bayram tədbirləri üçün sabiq prezidentlər Levon Ter-Petrosyana, Robert Köçəryana və Serj Sərkisyana dəvət göndəriləcəyini deyib.
1991-ci il sentyabrın 21-də Ermənistanda müstəqillik referendumu keçirilib, iştirakçıların 99 faizi respublikanın SSRİ-dən ayrılmasına səs verib, sentyabrın 23-də parlament bu niyyəti rəsmiləşdirib.
Levon Ter-Petrosyan prezident postunu 1991-1998, Robert Köçəryan 1998-2008, Serj Sərkisyan 2008-2018-ci illərdə tutub.
Bu il aprelin 9-da prezident səlahiyyətləri başa çatan Serj Sərkisyan aprelin 17-də baş nazir kürsüsünə gətirilib. Ancaq xalq etirazlarına görə Serj Sərkisyan aprelin 23-də istefa verib. Etirazların lideri Nikol Paşinyan mayın 8-də baş nazir kürsüsünə oturub. Onun hakimiyyətə gəlişindən bir müddət sonra sabiq prezident Robert Köçəryana cinayət işi qaldırılıb. Robert Köçəryan 2008-ci ildə hakimiyyəti qanunsuz yolla, zorakılıqla Serj Sərkisyana ötürməkdə ittiham edilir.
İyulun 27-də Robert Köçəryan 2 ay müddətinə həbs edilib, ancaq avqustun 13-də toxunulmazlıq hüququ əsası ilə azadlığa buraxılıb.
Nikol Paşinyan Serj Sərkisyanın prezidentliyi zamanı, 2009-cu ildən 2011-ci ilə kimi həbsdə yatıb.
