Ukrayna Rusiya ilə dostluğu rəsmən xətm edir
Ukrayna prezidenti Pyotr Poroşenko Milli Təhlükəsizlik və Müdafiə Şurasının 6 sentyabr 2018-ci il qərarını təsdiqləyib. Novator.az-ın məlumatına görə, dövlət başçısının imzası ilə qüvvəyə minən qərar Rusiya-Ukrayna dostluq, əməkdaşlıq və tərəfdaşlıq müqaviləsinin müddətini uzatmamağı nəzərdə tutur. Həmin müqavilə 1997-ci il mayın 31-də imzalanıb, 1999-cu il aprelin 1-dən qüvvəyə minib, 2009-cu il aprelin 1-də avtomatik olaraq 10 il müddətinə uzadılıb.
Pyotr Poroşenkonun 2018-ci il sentyabrın 17-də imzaladığı sənədə əsasən, Rusiya-Ukrayna dostluq, əməkdaşlıq və tərəfdaşlıq müqaviləsinin qüvvədən düşməsi barədə qanun layihəsi hazırlanacaq, bununla da müqavilə 2019-cu il aprelin 1-dən yox sayılacaq.
Rusiya 2014-cü ildə Ukraynanın Krım bölgəsini işğal edərək özünə birləşdirib. Moskva Donetsk və Luqansk vilayətlərinin (Donbas bölgəsi) bir hissəsini işğal altında saxlayan separatçı rejimləri də dəstəkləyir. Bu üç bölgədən 1,5 milyon ukraynalı köçkün düşüb. Donbas bölgəsində 2014-cü ildən davam edən silahlı münaqişədə 10 mindən çox adam həlak olub.
