![]({"full":{"0":"2018\/09\/DSK-yeni-1.jpg","1":749,"2":374,"3":false,"file":"https:\/\/novator.az\/wp-content\/uploads\/2018\/09\/DSK-yeni-1.jpg"}})
Qeyri-neft sektoru 0,9 faiz, neft sektoru 0,4 faiz artıb
- 17 Sentyabr 2018
- comments
- Novator.az
- Posted in ManşetXəbər
Sentyabrın 17-də Dövlət Statistika Komitəsi makroiqtisadi göstəriciləri yayıb. Novator.az-ın məlumatına görə, hesabatda qeyd olunur ki, 2018-ci ilin yanvar-avqust aylarında ölkədə 50 milyard 521,9 milyon manatlıq və ya əvvəlki ilin 8 ayı ilə müqayisədə 0,7 faiz çox ümumi daxili məhsul (ÜDM) istehsal edilib. İqtisadiyyatın qeyri-neft sektorunda 0,9 faiz, neft sektorunda 0,4 faiz artım qeydə alınıb, əhalinin hər nəfərinə düşən ÜDM 5153,1 manata bərabər olub.
2017-ci ilin yanvar-avqust ayları ilə müqayisədə kənd təsərrüfatının ümumi məhsulunun 4,2 faiz, o cümlədən bitkiçilik məhsullarının istehsalının 5,8 faiz, heyvandarlıq məhsullarının istehsalının 2,6 faiz artdığı bildirilir.
Nəqliyyat sektorunda yük daşınması 1,2 faiz, sərnişin daşınması 1,3 faiz, informasiya və rabitə xidmətlərinin həcmi dəyər ifadəsində 7,6 faiz yüksəlib.
Hesabata görə, əhalinin gəlirləri nominal ifadədə 9,5 faiz artaraq 34 milyard 786,3 milyon manata çatıb.
8 ayda dövlət büdcəsinə 14 milyard 29,7 milyon manat vəsait daxil olub, büdcədən 13 milyard 485,7 milyon manat vəsait xərclənib.
2018-ci il avqust ayının 1-nə ölkənin bank və digər kredit təşkilatlarının kredit portfeli milli valyuta ekvivalentində 12 milyard 170,7 milyon manat təşkil edib. Ödəmə vaxtı keçmiş kreditlərin məbləği ümumi kredit portfelinin 14,6 faizinə bərabər olub.
Əhalinin banklardakı əmanətlərinin milli valyuta ekvivalentində məbləği avqustun 1-nə 8 milyard 49,5 milyon manat göstərilib.