Müsavatçı həbs olunub
Müsavat Partiyasının üzvü Əziz Şahinoğlu (Qəhrəmanov) 10 sutkalığa həbs olunub.
İnzibati həbs qərarı sentyabrın 17-si Yasamal Rayon Məhkəməsində çıxarılıb.
Müsavat fəalının nədə təqsirli bilindiyi haqda rəsmi məlumat yayılmayıb. Qeyri-rəsmi xəbərlərdə onun polisə müqavimətdə təqsirli bilindiyi vurğulanır.
Əziz Şahinoğlu sentyabrın 15-də Xarici İşlər Nazirliyinin binası qarşısında təkbaşına aksiya keçirmişdi. O, “Xarici İşlər Nazirliyi, mənasız sülh danışıqlarını durdurun! Düşmənlə müharibə dili ilə danışın!” şüarı yazılmış plakatı qaldıraraq Qarabağ münaqişəsi ətrafında 25 ildən çoxdur aparılan danışıqların nəticəsiz olmasına etiraz etmişdi.
Əziz Şahinoğlu həmin gündən tutularaq polis bölməsində saxlanırdı.
Müsavat Partiyasının mətbuat xidməti xatırladır ki, Əziz Şahinoğlu ötən il də inzibati həbsdə olub, müxalifətin mitinqində iştirak etdiyi üçün 20 sutka müddətinə azadlıqdan məhrum edilib.
