Qorunan əmanətlərdə yenilik
Konstitusiya Məhkəməsinin Plenumu Nazirlər Kabinetinin sorğusu əsasında “Əmanətlərin sığortalanması haqqında” qanunun 2.1.2.6-cı maddəsini şərh edib. Novator.az bildirir ki, həmin maddəyə əsasən, müəyyən edilmiş həddən yuxarı illik faiz dərəcəsi ilə qəbul edilmiş əmanətlər qorunan əmanətlərə – Əmanətlərin Sığortalanması Fondunun kompensasiya etdiyi əmanətlərə aid edilmir.
Konstitusiya Məhkəməsinin qərarında qeyd olunur ki, əmanətin qorunan əmanət statusuna aid edilməsi üçün onun illik faiz dərəcəsi müəyyən edilmiş həddən artıq olmamalıdır, əmanətlə bağlı verilən bonus isə illik faiz dərəcəsinə aid edilmir. Qərara görə, müəyyən edilmiş həddən yuxarı illik faiz dərəcəsi ilə qəbul edilmiş və təshih tədbirinin tətbiqindən sonra əmanətlərin şərtlərinin dəyişdirilməsi (faiz dərəcəsinin aşağı salınması) yolu ilə qorunan əmanət statusuna aid edilmiş əmanətlər qorunan əmanətlər hesab edilməlidir.
Qorunan əmanətlər üzrə illik faiz dərəcəsinin yuxarı həddini maliyyə bazarlarına nəzarət orqanı və Mərkəzi Bankla razılaşdırmaqla Əmanətlərin Sığortalanması Fondunun Himayəçilik Şurası müəyyənləşdirir.
