Gənc fəalın məhkəməsi: 7 il həbs təklifi verilib
Bakı Ağır Cinayətlər Məhkəməsi Azərbaycan Xalq Cəbhəsi Partiyasının fəalı Orxan Baxışlının işi üzrə prosesi sentyabrın 18-də davam etdirəcək.
AXCP Gənclər Komitəsinin üzvü Orxan Baxışlı mayın 6-sı Bakıda tutulub. Mayın 8-də Yasamal Rayon Məhkəməsi onun barəsində həbs qətimkan tədbiri seçilib. Gənc fəal Cinayət Məcəlləsinin 234.4.3-cü (satış məqsədilə külli miqdarda narkotik əldə etmə, daşıma və ya saxlama) maddəsi ilə ittiham olunur.
“Turan”ın məlumatına görə, sentyabrın 13-ü Bakı Ağır Cinayətlər Məhkəməsində keçirilən prosesdə dövlət ittihamçısı çıxış edib. O, gənc fəalı 7 il müddətinə azadlıqdan məhrum etmək təklifi verib. Sentyabrın 18-də davam etdiriləcək iclasda vəkilin və təqsirləndirilən şəxsin çıxışı gözlənir.
Həbsindən bir neçə gün əvvəl – mayın 3-də Orxan Baxışlı 2005-ci ildə öldürülən jurnalist Elmar Hüseynovun Qurd qapısı qəbiristanlığındakı məzarı üstündə çıxış edib. Beynəlxalq Söz və Mətbuat Azadlığı Gününə həsr olunmuş ziyarətdə gənc fəal Elmar Hüseynovun qətlində hakimiyyəti günahlandırıb. AXCP fəalları həbsi bu çıxışla bağlayırlar. Hüquq mühafizə orqanları isə gənc fəalın üstündən 6 qram heroin çıxdığını bəyan edib.
