11 qrup, 151 məhbus
Novator.az Siyasi Məhbusları Müdafiə Mərkəzinin tərtib etdiyi siyahıya nəzər salıb.
Hüquq müdafiəçiləri Leyla Yunus, Oqtay Gülalıyev, Elşən Həsənovun yaratdığı mərkəz siyasi məhbus saydığı 151 nəfəri 11 qrupa bölüb.
Jurnalist və bloqçular bölümündə bu şəxslər var: Seymur Həzi, Əfqan Muxtarlı, Mehman Hüseynov, Nicat Əliyev, Araz Quliyev, Rəşad Ramazanov, Fikrət Fərəməzoğlu, Elçin İsmayıllı, Ziya Əsədli.
Yazıçı və şairlər qrupunda Tofiq Həsənli, hüquq müdafiəçiləri qrupunda Əliabbas Rüstəmov yer alır.
Müxalif partiya və hərəkatların üzvləri qrupuna AXCP-dən Fuad Qəhrəmanlı, Gözəl Bayramlı, Asif Yusifli, Məmməd İbrahim, Fuad Əhmədli, Orxan Baxışlı, Saleh Rüstəmov, Vidadi Rüstəmli, Aqil Məhərrəmov, Babək Həsənov, Ruslan Nəsirov, Müsavat Partiyasından Əlikram Xurşidov salınıb.
Gənc fəallar qrupunda İlkin Rüstəmzadə, Qiyas İbrahimov, Bayram Məmmədov və Elgiz Qəhrəman yer alır.
Keçmiş dövlət məmurları bölümündə sabiq səhiyyə naziri Əli İnsanov, İsmayıllı şəhərindən Vasif İbrahimov, keçmiş prokurorluq işçisi Rüfət Səfərov var.
İnanclılar qrupuna 81 nəfərin adı salınıb.
14 nəfər ömürlük məhkumlar qrupunda, 12 nəfər sosial etirazların qurbanları qrupunda yer alır.
Siyasi Məhbusları Müdafiə Mərkəzi 10 nəfəri MTN-də cinayətlərin qurbanları qrupuna daxil edib.
Digər qrup girovlardır (4 nəfər).
Avropa Şurası 2012-ci ildə siyasi məhbus anlayışının meyarlarını müəyyənləşdirib. Meyarlara görə, azadlıqdan məhrum edilən şəxsə bu hallarda siyasi məhbus kimi baxılmalıdır: saxlanma fikir, vicdan və din azadlığı, fikrin ifadə olunması və informasiya azadlığı, toplaşma və birləşmə azadlığı pozulmaqla həyata keçirilibsə; saxlanma istənilən cinayətlə əlaqəsi olmadan siyasi səbəblərdən həyata keçirilibsə; həbsdə saxlamanın müddəti və ya onun şərtləri şəxsin ittiham olunduğu cinayətə proporsional deyilsə; vətəndaş digər şəxslərlə müqayisədə ayrı-seçkilik əsasında saxlanıbsa və ya saxlama ədalətsiz məhkəmə çəkişməsinin nəticəsidirsə və bu, hakimiyyətin siyasi motivləri ilə bağlıdırsa.
