Sərmayə azalıb, sənaye irəli gedib
Sentyabrın 13-də Dövlət Statistika Komitəsi yeni hesabatlar yayıb. Novator.az-ın məlumatına görə, sərmayə hesabatında bildirilir ki, 2018-ci ilin yanvar-avqust aylarında ölkənin iqtisadi və sosial sahələrinin inkişafı üçün əsas kapitala 8 milyard 953,6 milyon manat və ya əvvəlki ilin müvafiq dövrü ilə müqayisədə 12,8 faiz az vəsait yönəldilib. Qeyri-neft sektoruna yönəldilmiş vəsaitin həcmi isə 22,7 faiz artıb.
Daxili mənbələrdən əsas kapitala yönəldilmiş vəsait ümumi sərmayənin 59,4 faizini təşkil edib.
Başqa bir hesabata əsasən, sənaye müəssisələri və bu sahədə fəaliyyət göstərən fərdi sahibkarlar yanvar-avqust aylarında 31,6 milyard manatlıq sənaye məhsulu istehsal edib, bu da əvvəlki ilin müvafiq dövrü ilə müqayisədə 1,9 faiz çoxdur. Sənayenin qeyri-neft sektorunda məhsul istehsalı 10,8 faiz, neft sektorunda isə 0,6 faiz artıb.
