Fərman: elektron hökumət gücləndirilir
Prezident İlham Əliyev elektron hökumətlə bağlı yeni tədbirlərə fərman verib. Sentyabrın 12-də imzalanan fərmanla dövlət informasiya ehtiyatları və sistemlərinin formalaşdırılması, aparılması, inteqrasiyası və arxivləşdirilməsi qaydaları təsdiqlənib. Sənədə əsasən, Elektron Hökumət İnformasiya Sisteminin (EHİS) ilkin olaraq üç altsistemi yaradılmalıdır: Kommunal Xidmətlər Vahid İnformasiya Sistemi; Sosial Xidmətlər Vahid İnformasiya Sistemi; Aqrar Xidmətlər Vahid İnformasiya Sistemi.
Novator.az bildirir ki, Kommunal Xidmətlər Vahid İnformasiya Sisteminin operatoru funksiyalarını Energetika Nazirliyi, Sosial Xidmətlər Vahid İnformasiya Sisteminin operatoru funksiyalarını Əmək və Əhalinin Sosial Müdafiəsi Nazirliyi, Aqrar Xidmətlər Vahid İnformasiya Sisteminin operatoru funksiyalarını Kənd Təsərrüfatı Nazirliyi həyata keçirməlidir.
Vətəndaşlara Xidmət və Sosial İnnovasiyalar üzrə Dövlət Agentliyinə iki ay müddətində dövlət informasiya ehtiyatlarının və sistemlərinin formalaşdırılması, aparılması, inteqrasiyası və arxivləşdirilməsi ilə bağlı texniki tələbləri təsdiqləmək; dövlət informasiya ehtiyatlarının, sistemlərinin və elektron xidmətlərin vahid reyestrini təşkil etmək və başqa məsələlər tapşırılıb.
Dövlət informasiya ehtiyatları və sistemlərinin rəsmi statistik məlumatlarla təmin olunması məqsədilə Dövlət Statistika Komitəsinin müvafiq informasiya sistemi Elektron Hökumət İnformasiya Sisteminə inteqrasiya edilməlidir.
