Avrasiya İqtisadi İttifaqı: ərzaq neçəyədir?
Ərzaq məhsullarının Avrasiya İqtisadi İttifaqı ölkələri üzrə müqayisəli qiymətləri yayılıb.
Avrasiya İqtisadi İttifaqını 2014-cü ildə Rusiya, Qazaxıstan və Belarus yaradıb. 2015-ci ildə Ermənistan və Qırğızıstan da bu quruma daxil olublar.
Novator.az-ın məlumatına görə, Ermənistanda mal ətinin kiloqramı 5,9 dollara, Rusiyada 5,5 dollara, Qırğızıstanda 4,7 dollara, Qazaxıstanda 4,4 dollara, Belarusda 3,7 dollara satılır.
Donuz ətinin kiloqramı Ermənistanda 7,2 dollardır. Rusiyada bu məhsula 4,4 dollar, Qırğızıstanda 4,3 dollar, Qazaxıstanda 3,7 dollar, Belarusda 3,1 dollar qiymət qoyulub.
Toyuq ətinin kiloqramı Qırğızıstanda 3,4 dollar, Ermənistanda 3 dollar, Rusiya və Qazaxıstanda 2,2 dollar, Belarusda 1,7 dollardır.
Balığın kiloqramı Ermənistanda 5,2 dollara, Rusiyada 3 dollara, Qırğızıstanda 2,9 dollara, Belarusda 2,6 dollara, Qazaxıstanda 1,9 dollara təklif olunur.
Birinci növ bişmiş kolbasanın kiloqramı Rusiyada 6,2 dollar, Qazaxıstanda 4,9 dollar, Qırğızıstanda 4,7 dollar, Ermənistanda 4,6 dollar, Belarusda 2,6 dollardır.
Kərə yağının kiloqramı üzrə qiymətlər belədir: Ermənistan – 10 dollar, Rusiya – 9 dollar, Belarus – 7 dollar, Qazaxıstan – 5,8 dollar, Qırğızıstan – 4,8 dollar.
Şəkərin kiloqramı Ermənistan və Belarusda 80 sent, Qırğızıstanda 70 sent, Rusiya və Qazaxıstanda 60 sentdir.
Əla növ unun kiloqramı Ermənistanda 80 sentə, Qırğızıstanda 60 sentə, digər üç ölkədə 50 sentə satılır.
Bir kiloqram kartof Ermənistanda 50 sentə, Belarusda 20 sentə, digər üç ölkədə 40 sentədir.
Pomidorun kiloqramına Rusiyada 2,4 dollar, Belarusda 2,3 dollar, Ermənistan və Qırğızıstanda 1,8 dollar, Qazaxıstanda 1,6 dollar qiymət qoyulub.
10 ədəd yumurta Ermənistanda 1,5 dollara, Qırğızıstanda 1,1 dollara, Belarusda 1 dollara, Rusiyada 90 sentə, Qazaxıstanda 80 sentədir.
Statistik bilgiləri Avrasiya İqtisadi Komissiyası yayıb.
