Yeni ticarət hesabatları
2018-ci ilin yanvar-iyul aylarında Azərbaycanın hüquqi və fiziki şəxsləri dünyanın 170 ölkəsi ilə ticarət əməliyyatları həyata keçirib, 101 ölkəyə məhsul ixrac olunub, 162 ölkədən mal alınıb. Novator.az-ın məlumatına görə, Dövlət Statistika Komitəsi bildirir ki, 7 ayda xarici ticarət dövriyyəsi 17 milyard 474,7 milyon ABŞ dolları, o cümlədən ixracın dəyəri 11 milyard 698,5 milyon dollar, idxalın dəyəri 5 milyard 776,2 milyon dollar təşkil edib, 5 milyard 922,3 milyon dollarlıq müsbət ticarət saldosu yaranıb.
Hesabata əsasən, 2017-ci ilin yanvar-iyul ayları ilə müqayisədə xarici ticarət dövriyyəsi faktiki qiymətlərlə 35,6 faiz, real ifadədə 0,7 faiz, o cümlədən ixrac 0,8 faiz, idxal 0,5 faiz artıb.
Yanvar-iyul aylarında 968,6 milyon dollar dəyərində qeyri-neft məhsulları ixrac edilib, bu da 2017-ci ilin yanvar-iyul aylarına nisbətən faktiki qiymətlərlə 13,5 faiz, real ifadədə 3,8 faiz çoxdur.
Başqa bir hesabata görə, 2018-ci ilin yanvar-avqust aylarında pərakəndə ticarət şəbəkəsində satılmış məhsulların dəyəri əvvəlki ilin eyni dövrünün səviyyəsini müqayisəli qiymətlərlə 2,7 faiz üstələyərək 23 milyard manata bərabər olub. Ticarət dövriyyəsinin 11 milyard 532,4 milyon manatını ərzaq məhsulları, içkilər və tütün məmulatları, 11 milyard 434 milyon manatını qeyri-ərzaq məhsulları təşkil edib.
Hesabat dövründə alıcıların son istehlak məqsədilə aldıqları mallara xərclədiyi vəsaitin 45,9 faizi ərzaq məhsullarının alınmasına sərf olunub.
Əhalinin bir nəfərinə düşən orta aylıq pərakəndə ticarət dövriyyəsi 292,8 manat göstərilir.
