Prezident təhsil ocaqlarına baş çəkib
Prezident İlham Əliyev sentyabrın 12-si Bakının Keşlə qəsəbəsindəki 227 saylı tam orta məktəbdə əsaslı təmir və yenidənqurma işlərindən sonra yaradılan şəraitlə tanış olub. AZƏRTAC xəbər verir ki, məktəbin binası 1937-ci ildə tikilib. 2005-ci və 2007-ci illərdə məktəb üçün əlavə iki korpus istifadəyə verilib.
1176 şagirdlik məktəbdə 38 sinif otağı, informatika kabineti, laboratoriya, idman və akt zalları, hərbi otaq və yeməkxana var.
İlham Əliyev Bakının Nəsimi rayonunda general-leytenant Kərim Kərimov adına 8 nömrəli tam orta məktəbə də baş çəkib. Məktəbin binası 1900-cü ildə inşa edilib. Üçmərtəbəli bina əsas və yardımçı korpuslardan ibarətdir. 780 şagirdlik təhsil ocağında məktəbəhazırlıq qrupları da fəaliyyət göstərir.
Yenidənqurma işləri zamanı bütün sinif otaqları, emalatxana, hərbi otaq, laboratoriyalar, yeməkxana, idman və akt zalları, eləcə də digər xidmət otaqları əsaslı şəkildə təmir edilib, əlavə 5 sinif otağı artırılıb.
Prezident Bakının Səbail rayonunda Həbib bəy Mahmudbəyov adına 2 nömrəli texniki-humanitar liseydə də olub. Liseyin yerləşdiyi binanın yaşı 100 ildən çoxdur. Ümumi sahəsi 2500 kvadratmetr olan üçmərtəbəli binada 31 sinif otağı və müxtəlif fənn kabinetləri, kitabxana, yeməkxana var. Liseydə yeni ekoloji kabinet, hərbi hazırlıq kabineti yaradılıb. İdman və akt zalları müasir səviyyədə təmir olunub.
