Yenə sülh
Azərbaycanın milli komandası UEFA Millətlər Liqasının qrup mərhələsində ikinci oyununu keçirib. D divizionunun 3-cü qrupunda yer alan yığma sentyabrın 10-u Maltada sülh bağlayıb – 1:1.
Milli sentyabrın 7-si Bakıda Kosovo seçməsi ilə oyunda da bir xalla kifayətlənmişdi. Həmin matçda hesab açılmamışdı.
Novator.az bildirir ki, Azərbaycan yığması oktyabrın 11-də Farer adaları səfərinə çıxacaq.
Milli komanda oktyabrın 14-də Maltanı, noyabrın 17-də Farer adalarını qəbul edəcək. Hər iki görüş Bakıda olacaq.
Sonuncu matç noyabrın 20-si Kosovoda keçiriləcək.
İki turdan sonra qrupa 4 xalla Kosovo başçılıq edir. Farer adalarının 3, Azərbaycanın 2, Maltanın 1 xalı var.
Millətlər Liqası 2020-ci ilin Avropa futbol çempionatının final mərhələsinə hər diviziondan bir vəsiqə verir. Bunun üçün divizionlardakı qrup qalibləri arasında yarımfinal və final matçları keçiriləcək. Qrup qalibi Avropa çempionatına həmin turnirin özünün seçmə mərhələsindən düşərsə, onu Millətlər Liqasının növbəti ən yaxşı komandası əvəzləyəcək.
D divizionunun 1-ci qrupunda Gürcüstan, 2-ci qrupunda Belarus və Lüksemburq, 4-cü qrupunda Makedoniya önə çıxıb.
A divizionundakı dörd qrup qalibi Millətlər Liqasının 2019-cu ilin iyununda keçiriləcək final mərhələsinə vəsiqə qazanacaq. Bu raund yarımfinallar, üçüncü yer uğrunda oyun və finaldan ibarətdir.
B, C və D divizionlarının qrup qalibləri yuxarı diviziona çıxacaq, A, B və C divizionlarının qruplarında sonuncu olanlar aşağı diviziona düşəcək.
