Ukraynada NATO sorğusu
Kiyev Beynəlxalq Sosiologiya İnstitutu və Demokratik Təşəbbüslər Fondu Ukraynada NATO mövzulu sorğu keçirib. Novator.az-ın məlumatına görə, sorğuya qatılanların 42%-i ölkənin NATO-ya üzvlüyünü milli təhlükəsizliyin ən yaxşı təminatı saydığını bildirib.
18 yaşdan yuxarı 2041 nəfərin qatıldığı sorğuda 6,4% Rusiya və digər MDB ölkələri ilə hərbi ittifaqa tərəfdar çıxıb.
Respondentlərin 35,3%-i Ukraynanın hərbi bloklara qoşulmasının əleyhinə olub.
Rəyi öyrənilən şəxslərin 63%-i NATO-ya üzvlüklə bağlı referendumda iştiraka hazır olduğunu bəyan edib. Onların 67%-i ölkənin NATO üzvlüyünə tərəfdar olduğunu vurğulayıb.
Rusiya 2014-cü ildə Ukraynanın Krım bölgəsini işğal edərək özünə birləşdirib. Moskva Donetsk və Luqansk vilayətlərinin bir hissəsini işğal altında saxlayan separatçı rejimləri də dəstəkləyir.
1949-cu ildə yaradılmış NATO-ya 29 ölkə daxildir: ABŞ, Albaniya, Almaniya, Belçika, Bolqarıstan, Böyük Britaniya, Çexiya, Danimarka, Estoniya, Fransa, Xorvatiya, İslandiya, İspaniya, İtaliya, Kanada, Latviya, Litva, Lüksemburq, Macarıstan, Monteneqro, Niderland, Norveç, Polşa, Portuqaliya, Rumıniya, Slovakiya, Sloveniya, Türkiyə, Yunanıstan.
